Акафист силуану афонскому

Редкие Богослужебные тексты

Служба
преподобному отцу нашему
Аристоклию
старцу Афонскому
и чудотворцу Московскому

На малой вечерни
На Господи воззвах: стихиры на 4, глас 2.

Мира земнаго красоту отринув,* славу, яже едино от Бога, взыскуя,* стопы направил еси ко святей горе Афонстей* и милостию Богородицы Владычицы* достигл еси сего пристанища спасения,* в радости славя Бога Благодетеля,* хотящим всем спастися и в разум истины приити.
Песнею церковною прославляюще в радовании,* восхвалим, верные людие,* преблаженнаго старца Афонскаго* и чудотворца Московскаго Аристоклия,* Божия избранника и возлюбленнаго чада Богородицы,* той бо имея дерзновение ко Господу,* молится о спасении душ наших.
В поте трудов твоих удручил еси* плоть ветхаго человека в себе,* душу же укрепил еси в подвизех веры и любве,* якоже древния отцы в делех благочестия, преподобне Аристоклие,* моли Христа Бога* спастися душам нашим.
Слава, глас 6:
Егда достигл еси меру возраста духовнаго,* послаша тя старцы обители Афонския,* во град первопрестольный Москву* да подымеши труды устроения подвория и утвердиши веру православных людей,* многия обдержимых напастьми.
И ныне, Богородичен, глас тойже:
Богородице, Ты еси Лоза истинная, возрастившая нам плод живота, Тебе молимся, молися, Владычице, со святыми апостолы, помиловати души наша.

На стиховне стихиры, глас 6.
Подобен: Тридневен:
Преблаженне отче Аристоклие,* пространный путь мирские суеты оставил еси,* всего себе предав еси воле Божественней,* избрал еси не обинуяся* стезю монашескаго многотруднаго жития,* во дни и нощи Господеви работал еси неленостно* и унаследовал еси Царствие Небесное,* идеже есть всех веселящихся жилище.
Стих: Честна пред Господем* смерть преподобных его.
Днесь торжествует святая гора Афонская* и радуется страна Московская,* празднуя честную память преподобнаго Аристоклия,* той бо дерзновенно молится пред престолом Бога Вышняго* о спасении душ наших.
Стих: Блажен муж, бояйся Господа,* в заповедех Его восхощет зело.
Преподобне отче Аристоклие,* прими моление наше,* да избавимся от бури бед и искушений,* и всяких напастей вражиих,* ты бо имаши дерзновение ко Владыце Христу,* спасающему род человеческий.
Слава и ныне, глас 8:
Владычице, прими молитвы раб Твоих* и избави нас* от всякия нужды и печали.
На велицей вечерни.
Блажен муж: 1-й антифон:
На Господи воззвах: стихиры на 8, глас 2.
Преподобне отче Аристоклие,* издетска прилежал еси Богу в любви,* и познал еси чудодействующу силу благодати,* еюже со одра тяжкия болезни* восстал еси в здравии* и в радости воспел еси:* Слава Тебе, Господи, благодеявшему ми.
Преблаженне отче Аристоклие,* измлада верою душу свою утвердив,* материю твоею научен был еси* изрядно молитися великому угоднику Божию* Николаю Чудотворцу:* того бо ходатайством Господь воздвиг тя* от недуга сурова и многоболезненна.
Мира сего славу возненавидя,* душу твою горе простирая,* Единаго Бога вожделел еси зрети* и Тому Единому служити поревновал еси* и тако даровал Господь тебе по сердцу твоему* зрети высоту небесную* и благодатию просвети тя яве,* яко верного слугу Своего,* сего ради ублажаем тя,* угодниче Божий Аристоклие.
Ныне славит тя земля оренбургская,* идеже ты родился, избранниче Божий,* и в благочестии своею материю воспитан был еси,* в страсе Божием восходя в меру мужа совершенна,* и познав суету многомятежнаго мира,* возжаждал еси жития иноческаго,* имже вошел еси в чертог славы Небесныя.
Глас 8.
Преподобне отче Аристоклие,* прият тя святая гора Афонская,* яже есть удел Пречистыя Богородицы,* там бо сподоби тя Господь монашеского образа,* сего великаго ангельскаго чина* и нача в подвизех восходити от силы в силу,* побеждая демонския полки,* и тако прослави тя Христос Бог наш,* Его же с лики горних чинов присно воспеваеши.
Радуйся, священная главо,* преподобне отче Аристоклие,* иноков изрядне наставниче,* красотою духовною обитель свою озаряеши* и лукавых духов силою молитв сокрушаеши,* дерзновение имеяй к Человеколюбцу Христу,* Егоже моли о спасении душ наших,* чающих избавления от всякия беды* и напасти вражия.
Преславне отче Аристоклие,* ублажает тя земля Московская,* в нюже вселился еси,* исполняя послушание старцев святогорских,* тамо преспел еси в устроении подворья Афонскаго,* наипаче же в устроении душ человеческих,* в лютых бедах сущих* многия бо привел еси ко спасению и наследию Царствия небесных благ.
Воспоим благодарне, братие,* подвиги преподобнаго отца нашего Аристоклия,* пречестнаго старца Афонскаго* и прехвальнаго чудотворца Московскаго,* той бо во многих трудех попечения* о душах страждующих и от демонов мучимых* присно молится о спасении Христу Богу,* не хотящему смерти грешника,* но еже обратитися и живу быти ему.
Слава, глас 6:
Бог, прославляемый в совете святых,* ныне достоин есть пет быти гласы преподобными* вкупе же и твоим гласом радования воспеваемый,* яко цевницею духовною твоих добродетелей,* преподобне отче Аристоклие,* ими же украшен еси, яко древо райское,* насажденное во исходище вод* благодати Божия.
И ныне, Богородичнен, глас тойже:
Кто Тебе не ублажит, Пресвятая Дево?* Кто ли не воспоет Твоего пречистаго Рождества?* Безлетно бо от Отца воссиявый Сын Единородный,* Тойже от Тебя, Чистая, пройде,* неизреченно воплощься,* естеством Бог сый* и естеством быв человек нас ради,* не во двою лицу разделяемый,* но во двою естеству неслитно познаваемый.* Того моли, Чистая Всеблаженная,* помиловатися душам нашим.
На литии стихиры, глас 2:
Подобен: Егда от древа.
Радуйся, священная главо,* преподобне отче Аристоклие,* горних чинов собеседниче,* монахов богомудре наставниче,* скорбящих утешение,* недугующих исцелителю,* заблудших вразумление* и всех хотящих спасения* скорый помощниче.
Слава, глас 6
На земли пожил еси* яко ангел во плоти,* Духа Всесвятаго* стяжав в души твоей* и обрел еси покой неокрадомый,* восходя от силы в силу* и прослави тя Христос Бог,* яко верного слугу Своего,* и введе тя в чертог славы вечныя.
И ныне, глас той же
Творец и избавителю мой, Пречистая,* Христос Господь, из Твоих ложесн прошед,* в мя оболкийся, первыя клятвы Адама свободи.* Темже Ти, Всечистая,* яко Божии Матери же и Деве,* воистину вопием немолчно:* радуйся ангельски, радуйся, Владычице,* предстательство, и покрове* и спасение душ наших.
На стиховне стихиры, глас 2:
Приидите, возрадуемся, людие,* празднующе память добропобеднаго мужа,* преподобнаго отца нашего Аристоклия,* той бо пройде многотрудный путь земнаго странствия,* во бранех посрамив злые козни вражия,* силою смирения, терпения и послушания,* егоже увенчал славою Человеколюбец Господь.
Стих: Праведник, яко финикс процветет* и яко кедр иже в Ливане умножится.
Отче святый Аристоклие,* настави нас на путь правый,* имже сласл еси душу свою,* стяжав велия добродетели,* сии суть вера, надежда и любовь,* имиже восшел еси на лествицу духовную* и вниди враты райскими в Небесный чертог,* уготованный Господом всем любящим Его.
Стих: Честна пред Господем* смерть преподобных Его.
Славит тя, преподобне отче Аристоклие,* земля Московская и святая гора Афонская,* ты бо нелицемерно подъял еси* подвиги монашескаго жития* и исполнил еси вся повеленная от Господа,* Его же моли спастися душам нашим.
Слава, глас 1.
Кто возможет изрещи твоя труды,* многоскорбнаго иноческаго жития,* преподобне старче Аристоклие?* Кто познает твои брани с похотию плоти,* с похотию очес и гордостью житейскою?* Кто испытает твой крест неустанного попечения* о спасении всех чад твоих духовных?* Ты бо яко пастырь добрый душу свою* полагал еси за овец своих.* Ныне же восхваляем тя* яко небеснаго молитвенника* о чтущих с любовию святую память твою.
И ныне, Богородичен, глас тойже :
Се исполнися Исаиино проречение:* Дево бо родила еси* и по рождестве яко прежде рождества пребыла еси,* Бог бо бе рождейся,* темже и естества новопресече.* Но, о Богомати,* моления Твоих рабов, в Твоем храме приносимая Тебе, не презри,* но яко благоутробнаго Твоима рукама носящи,* на Твои рабы умилосердися* и моли спастися душам нашим.
Тропарь, глас 4.
Процвел еси яко финикс, на святей горе Афонстей* и яко кедр на земли русстей умножился еси,* Духа Святаго стяжав чистотою богоугоднаго жития* и мир Христов воцарися в души твоей,* предодобне отче Аристоклие,* моли Христа Бога* спастися душам нашим.

На утрени
По 1-м стихословии седален, глас 8.
Мира сего суету презрев, нетленных Небесных благ возжелал еси ревностно, Христу Подвигоположнику невозвратно последовал еси, богоносне отче Аристоклие, и Царствие Божие внутри себе обрел еси, добродетельми многими украсив душу твою и тако прославил еси Живоначальную Троицу, Ейже молися о спасении душ наших.
Слава, и ныне, Богородичен, глас тойже.
Яко Всенепорочная Невесто Творца,* яко Неискусомужная Мати Избавителя,* Приятелище яко суще Утешителя, Всепетая,* беззакония мя суща скверно жилище* и демонов игралище в разуме бывша,* потщися и сих злодействия мя избавити,* светло жилище добродетельми соделавши.* Светодательная и нетленная,* разжени облак страстей и Вышняго причастия сподоби* и Света невечерняго молитвами Твоими.
На 2-м стихословии седален, глас 3.
Взем иго Христово на рамо свое, научился еси от Божественнаго Пастыреначальника смирению и кротости и в терпении стяжал еси душу свою, темже вшел еси в радость Господа и наследовал еси жилище вечных благ, уготованных верным чадам Божиим от сложения мира. Сего ради поем ти, отче преблаженне Аристоклие, радуйся и веселися, яко мзда твоя многа на Небесех.
Слава, и ныне, Богородичен, глас тойже.
Яко невозделанна, Дево, лоза,* прекрасный Грозд, Христа, возрастила еси,* источающа нам вино спасительное, всех веселящее души и телеса.* Темже яко виновна Тя добрых ублажающе,* присно со Ангелом вопием Ти,* радуйся Обрадованная.
По полиелеи, седален, глас 8.
Славит тя угодниче Божий Аристоклие, первопрестольный град Москва, в радости велией обретшая твоя цельбоносныя мощи в лето прославления твоего в сонме святых. Обаче не забуди убогих твоих до конца, чтущих твою святую память, но присно поминай стадо словесных овец, верных чад твоих, да твоими молитвами Человеколюбец Христос спасет души наша.
Слава, и ныне, Богородичен:
О Тебе радуется, Благодатная, всякая тварь,* ангельский собор и человеческий род,* освященный храме и раю словесный,* девственная похвало, из Нея же Бог воплотися,* и Младенец бысть, прежде век сый Бог наш,* ложестна бо Твоя престол сотвори* чрево Твое пространнее небес содела.* О Тебе радуется, Благодатная, всякая тварь, слава Тебе.
Степенна, 1-й антифон 4-го гласа.
Прокимен, глас 4: Честна пред Господем* смерть преподобных Его.
Стих: Что воздам Господеви овсех, яже воздаде ми?
Всякое дыхание: Евангелие от Матфея, зачало 43.
По 50-м псалме стихира, глас 6:
Вожделев града Небеснаго,* отреклся еси прелестнаго мира сего,* во зле страстей лежащаго,* и в радости вселился еси* во Уделе Пресвятыя Богородицы,* Еяже Покровом все стрелы вражия угасил еси* и яко крин сельный процвел еси* в преподобстве и правде.

Канон Богородицы, глас 4
И канон преподобнаго Аристоклия, глас 8.

Песнь 1
Отверзу уста моя* и наполнятся Духа,* и слово отрыгну Царице Матери,* и явлюся, светло торжествуя,* и воспою, радуяся, Тоя чудеса.
Мати Присносущнаго Света и Отчия Премудрости,* умудри неразумие мое* и просвети мя светом разума Сына Твоего и Бога нашего.
Обретши сокровище, радуются,* темже и мы, имуще Тя, Всецарице,* милосердия сокровище Небесное и неиждиваемое,* воспеваем, радующееся, Твоя чудеса.
Лицу Твоему, — предрече Давид, — помолятся богатии людстии,* исполняющуся сему, вкупе с богатыми мы, добродетельми убозии,* молимся Тебе, Дево, пред ликом Твоим.
Якоже очи раб в руку господий своих,* тако очи наши устремлены суть к Тебе* и к лику Твоему, Всеблагая Владычице,* доднеже ущедриши рабы Твоя.
Ин. Песнь 1
Колесницегонителя фараоня погрузи* чудотворяй иногда Моисейский жезл, крестообразно поразив* и разделив море,* Израиля же беглеца, пешеходца спасе,* песнь Богови воспевающа.
Богоблаженне отче Аристоклие, вся претерпел еси скорбныя обстояния, измлада Христа возлюбив, Егоже непрестанно ныне славословиши на небесех с лики ангельских сил.
Познал еси телесне зело тяжелоносную болезнь в отрочестве и молитвами матере твоея пред иконою святителя Николая получил еси исцеление. Егдаже сподобися чина монашескаго, милосердовав по дару Христа, нача целити недуги немощствующих.
Вселився в вертоград святыя горы Афонския, всего себе покорил еси воли старцев обители, плоть распяв со страстьми и похотьми, и тем созижде Господь сердце свое чисто и непоколебимо.
Богородичен: Чудес Твоих Божественных множество благохвалити предпринимая,* Тя, молю, Дево, от сердца,* благодать подаждь ми.
Песнь 3
Твои песноловцы, Богородице,* живый и независтный Источниче,* лик себе совокупльшия, духовно утверди,* в Божественней Твоей славе* венцев славы сподоби.
Воззри Твоими очесы, Марие,* и виждь благоутробно пред Тобою предстоящих и Тя с верою призывающих,* и услыши сих, Богорадованная.
Крепость даруй нам, Чистая,* да творим волю Сына Твоего со страхом и любовию,* укрепляеши бо рабы Твоя яко Матерь Всесильнаго Бога нашего.
Страстьми боримии и невидимыми сеятелями зол,* присно нуждаемся в Твоей, Владычице, необоримой помощи,* еяже не лиши нас Богоблагодатная.
Спасительный щит подаждь нам, Госпоже,* Твое державное заступление, имже началозлобнаго побеждающе коварства,* венцев славы сподобимся.

Ин. Песнь 3
Утверждей в начале Небеса разумом* и землю на водах основавый,* на камени меня, Христе, заповедей Твоих утверди,* яко несть свят паче Тебе,* Едине Человеколюбче.
Преспел еси в подвизех монашескаго жития, вся козни демонския посрамив силою веры и упованием на Христа, Победителя ада, Имже венчан был еси вечною славою.
В послушании богомудрым отцам стяжал еси сладость жития во Христе, Егоже иго легце понеся в радости, отонюдуже став яко столп непоколебим в брани с духами злобы поднебесными.
Гора святая Афонская торжествует и земля Московская проповедует твоя великие подвиги, имиже вся злокозненная искушения препобедил еси, яко доблий воин Христов.
Богородичен: Неизреченна зачала еси Господа и Спаса, Богоневесто,* избавляющаго ны от лютых, Тя с верою призывающия.
По 3-й песни седален.
Имже образом желает елень на источники водныя, сице возжада душа твоя, преподобне отче Аристоклие, к Богу Жизнодавцу, вся красная земнаго мира сего презрев, вышняя блага избрал еси и в поте лица потрудился еси на благословенней горе Афонстей и паки в стране Российстей, яко древний патриарх Иаков, две жене сочеташеся, и тако угодил еси Господу Богу содействующу.
Слава, и ныне, Богородичен:
Владычицу Тя мира вемы, Марие Всепетая,* яко родила еси нам всех Творца, Спасителя мира,* Иже и прославил Тебе, Пречистую Матерь Свою,* подая Тобою благодать и милость чтущим Тя* и молящимся Тебе, Богородице.
Песнь 4
Седяй в славе на Престоле Божества* во облаце легце,* прииде Иисус Пребожественный* нетленною дланию и и спасе зовущия:* слава, Христе, силе Твоей.
Припадая ко святей иконе Твоей, Дево,* вопию Ти от сердца сокрушена:* не попусти ми погибнути, Всемилостивая Госпоже,* житие мое во гресех иждившему.
Грехолюбив сый, удалихся, Владычице, Сына Твоего,* и лишен есмь дерзновения к Нему.* Темже к покаянию мя направи* и сподоби получити, иже погубих.
Богоизбранная Отроковице, в руне орошенном предвиденная,* ороси росою благодати изсохшую землю сердца моего* и благоплодну соделай душу мою.
Радуйся, Богоневесто, добродетельми, яко рясны златыми, преукрашенная,* радуйся, сосуде мира, имже врачуются зовущии:* слава, Христе, силе Твоей.
Ин. Песнь 4
Ты моя крепость, Господи,* Ты моя и сила,* Ты мой Бог, Ты мое радование,* не оставль недра Отча* и нашу нищету посетив.* Тем с пророком Аввакумом зову Ти:* силе Твоей слава, Человеколюбче.
Всего себе покорив всеблагой воли Божией, исполнил еси вся повеленая отцев духовных и возврашся в землю Российскую, подъял еси многоскорбный труд пастырскаго душепопечения.
Многими болезньми, душевными и телесными, одержимии, притекаше к тебе, отче святый, людие, просяще скорыя помощи и исцеляхуся.
Никогоже от себе изгоняя, силою, данной свыше тебе благодати из нездравия в здравие приводил еси болезнующих и тии отхождаху, славяще Многомилостиваго Бога.
Богородичен: Не имамы раби Твои инаго, разве Тебе, Предстательства и покрова.* Темже, Чистая, от сердца вопием:* всякие беды свободи стадо Твое* и верных, к Тебе прибегающих.

Песнь 5
Ужасошася всяческая* о Божественней славе Твоей:* Ты бо, Неискусобрачная Дево,* имела еси в утробе над всеми Бога* и родила еси Безлетнаго Сына,* всем воспевающим Тя* мир подавающая.
Несть, Всемилостивая Госпоже, таковаго,* иже бо лишися щедрот Твоих, прибег с верою к Твоему благоутробию.* Темже прилежно молим Тя:* сподоби и нас грешных милости Твоея.
Умистовление о всем мире сущая,* умоли, Дево, Сына Твоего, всех Судию,* да не помянет грехов наших,* и да избавимся Тобою всякого прещения Его,* находящаго на люди согрешившия.
Примерителя всяческих рождшая,* всемощным предстательством Твоим, Владычице, умиротвори нас к Нему,* к ближним и к себе самим, яко воспевающим Тя мир подавающая.
Умервщленную мою душу страстьми мерзкими, Всенепорочная, оживи,* жизни Хранителя рождшая,* и к стезе вечней и блаженней жизни управи.
Ин. Песнь 5
Всякую мя отринул еси* от лица Твоего, Свете незаходимый,* и покрыла мя есть чуждая тьма, окаяннаго?* Но обрати мя и к свету заповедей Твоих* пути мои направи, молюся.
Многи скорби претерпел еси, егда сопостат диавол людей оглаголати ти в неправде, обаче смирением препобедил вся козни лукаваго и вознесе тя Господь паче бывшаго.
Егда уверишася в твоей невинности, паки послаху тя старцы Афонстии во град Москву на прежде бывшее твое послушание и тамо зело преспел еси в добродетелех.
Недугующия течаху к тебе, святый отче, и никтоже тощь отхождаше, чудесем, тобою сотворенным тии дивляхуся, Бога дивнаго во святых Своих славяще.
Богородичен: Повелению Твоему, Владычице, повинуются вся стихии,* от нихже вреда да избавляеши Тя призывающих.

Песнь 6
Божественное сие и всечестное* совершающе праздненство,* Богомудрии, Богоматере,* придите, руками восплещим:* от Нея рождшагося Бога славим.
Ты – рабов Твоих утешение, Всеблаженная,* Ты – свет, удобрение и надежда спасения.* Ты убо промышлением Твоим всякия нужды и скорби избави нас.
Ведущи немощи наша, Богородительнице,* восполняй духовную и вещественную скудость нашу,* да Подающаго нам Тобою вся благая Бога славим.
Не остави нас, Всещедрая, внегда оскудевати крепости нашей,* не отступи от уповающих на Тя во исходе* и по исходе яви нам благости Твоея силу.
Преблагословенная Марие, книга Божия запечатленная,* в книзе живота вечнаго написатися нам сподоби,* да от Тебе рождшагося Бога славим.
Ин. Песнь 6
Очисти мя, Спасе,* многа бо беззакония моя,* и из глубины зол возведи, молюся,* к Тебе бо возопих, и услыши мя,* Боже спасения моего.
Христовою любовию уязвися, отче преподобне, оставил еси вся, яже в мире сем, ум вперив горе, точию Небесная помышлял еси.
Во граде Москве положил еси многия труды, подворие святыя горы Афонстия устрояя, да многоплодно послужит братия народу стаждущему и в нуждах сущему.
Возлюбленное чадо Пречистыя Богородицы был еси, денно и нощно моляся пред Ея святою иконою Скоропослушницею и церковь в Ея честь воздвигл еси, да присно славится Ея Всесвятое имя.
Богородичен: Купино неопалимая, радуйся юже Моисей виде на Синаи, и лествица, юже Иаков виде, преблагословенная Богородице Приснодево.
Кондак, глас 8
Новою звездою на небеси церковнем возсиял еси,* прошед путь многотруднаго монашескаго жития,* подвигами добродетелей венцы нетленныя обрел еси,* и поприще послушания во граде Москве мужественне скончал еси.* Темже и Христос Бог даром чудес обогати тя.* Преподобне отче Аристоклие,* Афонская похвало и земли российския украшение,* помянай нас, чтущих память твою.
Икос:
В страсе Божием соделывыя спасения путь, утвердился еси словом апостольским, яко любы мира сего вражда Богу есть; иже бо восхощет друг быти миру, враг Божий бывает, и вся блага земная в уметы вменив, возложь руку свою на рало, отнюдь не зрел еси вспять, но прямо стопы своя направил по словеси Господни и тако обрел еси мир и покой в души твоей, темже и Бог тя прослави яко вернаго раба Своего и увенча тя яко добропобеднаго воина Царя Небеснаго.

Песнь 7
Не послужиша твари Богомудрии* паче Создавшаго,* но огненное прещение мужески поправше,* радовахуся, поюще:* препетый отцев Господь и Бог, благословен еси.
Наставнице ко спасению рабов Твоих,* душе тричастное, Госпоже, исправи,* да благодати безстрастия сподобльшеся, поем:* препетый отцев Господь и Бог, благословен еси.
Желательную силу души к Божественному рачению направи,* да тою Бога всецело возлюбим* и к Нему присно стремимся,* яко всеблаженному желаний краю.
Яростную силу души* помози нам, Дево, обращати на невидимыя враги спасения нашего и спасительныя любве исполни сердца наша к ближним и к Богу.
Словесное души к Богоугодному созерцанию воскрыли, Владычице,* богопротивных помышлений избавляющи,* и всех нас благое мыслити, глаголати и творити укрепи.
Ин. Песнь 7
Божия снисхождения* огнь устыдеся в Вавилоне иногда,* сего ради отроцы в пещи, радованною ногою,* яко во цветнице, ликующе, пояху:* благословен еси, Боже отец наших.
В годину шатания страны Российския был еси яко свеща горящая, мрак неверия прогоняя, немощные укрепляя, малодушная утверждая и унывающих к Богу подвигая.
Яко адамант веру Христову исповедуя, бурю от богопротивник воздвизаемую утишая, всех притекающих к тебе в уповании на Бога Промыслителя утверждал еси и тем Церкви послужил еси.
Добрый пастырь явился еси, отче преблаженне, душу свою за овцы полагая и до последнего воздыхания стадо, еже собрал еси, окормлял еси, от сетей вражиих его избавляя.
Богородичен: Сына Отча единороднаго, безматерняя первее* и из Тебе рождена, уведевше безотча,* Божию Матерь исповедуем Тя, безстрастно рождшую* и Деву пребывшу паче слова, Марие Богоневесто.

Песнь 8
Отроки благочестивые в пещи* Рождество Богородичо спасло есть,* тогда убо образуемое,* ныне же действуемое,* вселенную всю воздвизает пети Тебе: Господа пойте дела и превозносите Его во вся веки.
Пажить плодоносну обретает стадо под Твоим, Богомати, управлением,* и душетлении волцы не мощны расхитити словесных овец,* хранимых благодатию Сына твоего и Бога.
Блажен человек, емуже есть заступление от Тебе, Богоневесто,* присно полагает таковый восхождения в сердце своем,* дондеже узрит себе спасенна и воспоет:* Господа пойте дела и превозносите Его во вся веки.
Седмисвещный светильниче, седмию дарами Духа светящий,* сподоби и нам украситися духовными плодами,* да, ущедреннии чрез Тебе Богом, поем:* Господа пойте дела и превозносите Его во вся веки.
Горо Божия, в Нейже благоволи жити Бог,* молися к Нему о нас, да помощию Его благое творяще,* сподобимся узрети премирные горы и тамо пети:* Господа пойте дела и превозносите Его во вся веки.
Ин. Песнь 8
Седмерицею пещь* халдейский мучитель* богочестивым неистово разжже,* силою же лучшею спасены сия видев,* Творцу и Избавителю вопияше:* отроцы, благословите,* священницы, воспойте, людие, превозносите во вся веки.
Со ангелы вселися душа твоя, отче святый, идеже несть печаль, болезнь и воздыхание, и тамо предстательствуй пред Престолом Бога живаго о чтущих память твою.
Исполнив закон Христов, веру соблюл еси, Царствие Небесное наследовал еси, не забуди убогих чад твоих до конца, но молися за ны Богу Всемилостивому, да спасет души наша.
Пронесл еси в терпении крест своего земнаго жития, отвергнув себе, и не обинуяся последовал еси Христу, всего себе покорив воли Бога, премудро спасающего род человеческий.
Богородичен: Чудес больше всех, Всенепорочная,* в Тебе новосодеявшееся чудо показася явственно:* Бога бо родила еси телесне,* земным за милосердие соединившася в неслитнем соединении, Богоневесто.

Песнь 9
Всяк земнородный* да взыграется, Духом просвещаемь,* да торжествует же Безплотых умов естество,* почитающе священное торжество Богоматере,* и да вопиет:* радуйся, Всеблаженная* Богородице, Чистая Приснодево.
Помяни, Госпоже, рабы Твоя, любовию славящия Тя,* услыши молящихся к Тебе* и молитвами Твоими благоуветлива нам соделай Сына Твоего и Бога* зде и на Страшном Суде Его,* Всеблаженная Богородице, Чистая Приснодево.
Радости Ангелов и человеков, свободны нас печалей житейских сотвори* и ходатайством Твоим некончаемых мук избави,* да временных и вечных бед Тобою избывше, вопием:* радуйся Всеблаженная Богородице, Чистая Приснодево.
Видимо пред образом Твоим предстояще,* невидимо же к Тебе, одесную Сына Твоего стоящей,* ум возводяще, молим Ти ся прилежно:* сподобитися нам райскаго блаженства умоли,* Всеблаженная Богородице, Чистая Приснодево.
Благаго Царя Благая Мати,* осени ны необоримым покровом Твоим,* Всеблаженная Богородице, Чистая Принодево.
Ин. Песнь 9
Ужасеся о сем Небо,* и земли удивишася концы,* яко Бог явися человеком плотски* и чрево Твое бысть пространнейшее Небес.* Тем Тя, Богородицу, Ангелов и человек чиноначалия величают.
Радуется Небо, сретая душу твою, отче святый, Сам Христос десницею вводит тя в райския врата в завершении твоего восхождения по лествице духовней.
Новое чудо яви нам твоими молитвами Господь, даровав обрести цельбоносныя твоя мощи во утешение всех чтущих твою святую память, благодарящих Бога, дивнаго во святых Своих.
Славит тя, богоблаженне отче Аристоклие, Церковь Божия в сонме всех святых, на святей горе Афонстей просиявших, и всех святых, на земли Московстей подвизавшихся, да твоим предстательством спасет души наша.
Рака мощей твоих святых, отче досточудне, источает милости всем, к тебе яко к скорому помощнику притекающим, иже и воспевают твое предивное дерзновение пред Владыкою Христом о спасении душ погибающих.
Богородичен: Яко иное Небо, перваго, Владычице, явльшися вышшее, Тя славим,* Солнце нам правды возсиявшее* и глубокую неведения тьму отгнавшее.
Светилен:
В вертограде Пречистыя Владычицы, святыя горы Афонския, делатель был еси, духовне подвизаяся, и тамо братию обители ко спасению приводил еси яко наставник изрядный, на земли Российстей скончал свое богоугодное житие и ныне с высоты Небесныя посылаеши помощь чтущим твою святую память, отче святый Аристоклие.
Богородичен:
Тя Заступницу имамы, грешнии, о Пресвятая Дево!* Ты благоуветлива нам соделай Сына Твоего* матерними Твоими мольбами.
На хвалитех стихиры на 4, глас 2.
Приидите днесь память праведнаго* и богоноснаго отца нашего Аристоклия* доброславнаго угодника Божия,* Афонскаго древа жизни благая отрасль,* и Российския земли цвет благоуханный.* Воспоим, людие, с верою зовуще:* спасай нас отче от всякаго зла и напасти вражия.
Измлада милость Божию познав*, исцелившую тя от тяжкаго недуга, прилепился еси всею душею Господу Творцу всяческих* и прииде в меру возраста духовнаго* оставил еси красная и лестная мира сего,* направил еси стопы своя к горе святей Афонстей* и тако обрел еси сладость жития во Христе.
Послушания быв рачителю,* никакоже прекословил еси отцем духовным* и стяжал еси в души своей Духа Святаго,* имже и добродетели утвердил еси в себе,* вся козни диавола препрев,* и восходя от силы в силу,* обрел еси мир и покой души своей.
Избранниче Пресвятыя Богородицы* небесныя Игумении возлюбленное чадо,* насельниче святыя горы Афонския,* преподобне отче Аристоклие* терпением и самоуничижением смирил себе* яко раб неключимый,* тем тя Христос Бог превознесе* яко наследника Царства Небеснаго* от сложения мира.
Слава, глас 8:
Новую звезду небесе Церковнаго прославим,* отцы горы Афонския и людие земли Российския,* се бо лучами любве и сердца милующаго* просвещает с высоты горния* души в скорбех и нуждах сущих* преподобный Аристоклий,* старец всехвальный,* Удела Богородицы светило изрядное* и града Москвы столпе благочестия.
И ныне, глас 6, Богородичен:
Богородице, Ты еси Лоза истинная,* возрастившая нам плод живота,* Тебе молимся, молися, Владычице,* со святыми апостолы,* помиловати души наша.
Славословие великое, Ектении и отпуст.
На Литургии
Блаженны от канона Святаго, песни 3-я и 6-я.
Прокимен, глас 7: Честна пред Господем смерть преподобных Его:
Стих: Что воздам Господеви о всех, яже воздаде ми?
Апостол к Галлатам, зачало 213.
Аллилуия, глас 6.Блажен муж, бояйся Господа, в заповедех Его восхощет зело.
Стих: Сильно на земли будет семя его.
Евангелие от Луки, зачало 24.
Причастен: В память вечную будет праведник, от слуха зла не убоится.

Оставить комментарий

Ваш e-mail не будет опубликован. Обязательные поля помечены *