Творец и избавитель мой пречистая текст

Всенощная и Литургия. Глас 6-й

Мир Вам, дорогие посетители православного сайта “Семья и Вера”!

Наступил Воскресный день, в который во всех православных храмах Русской Православной Церкви проходит праздничное Воскресное Богослужение. Всенощное бдение (вечерня и утреня) служится в субботу вечером, а сама Божественная Литургия в Воскресенье утром.

Богослужение 6-го Воскресного гласа будет проходить в нынешнем 2017 году в следующие Воскресные дни: 14 января; 4 марта; 15 июля; 9 сентября; 4 ноября; 30 декабря.

Тем из Вас, кто не может посетить храм в эти дни, предлагаем прослушать аудиозапись Воскресной службы. По ниже приведенному тексту многих стихир и Воскресного канона, можно следить за Богослужением.

ВЕЧЕРНЯ. ГЛАС 6-Й

Воскресные стихиры на Господи воззвах

Победу имея, Христе, юже на ада, / на Крест возшел еси: / да во тьме смерти седящия воскресиши с Собою, / Иже в мертвых Свободь, / Источаяй живот от Своего света, / Всесильне Спасе, помилуй нас.

Днесь Христос смерть поправ, / якоже рече, воскресе, / и радование мiрови дарова, / да вси взывающе, песнь тако рцем: / Источниче жизни, Неприступный Свете, / Всесильне Спасе, помилуй нас.

Тебе, Господи, Сущаго по всей твари, / грешнии камо бежим; / на Небеси Сам живеши, / во аде попрал еси смерть. / Во глубины морския; / тамо рука Твоя, Владыко. / К Тебе прибегаем, / Тебе припадающе молимся: / Воскресый из мертвых, помилуй нас.

Слава Отцу и Сыну и Святому Духу, и ныне и присно и во веки веков. Аминь.

Кто Тебе не ублажит, Пресвятая Дево; / кто ли не воспоет Твоего Пречистаго Рождества; / безлетно бо от Отца Возсиявый Сын Единородный, / Тойже от Тебе, Чистыя, пройде, / неизреченно воплощься, / естеством Бог сый, / и естеством быв Человек нас ради, / не во двою лицу Разделяемый, / но во Двою Естеству / неслитно Познаваемый. / Того моли, Чистая, Всеблаженная, / помиловатися душам нашим.

Воскресные стихиры на стиховне, глас 6-й

Воскресение Твое, Христе Спасе, / Ангели поют на Небесех, / и нас на земли сподоби, / чистым сердцем / Тебе славити.

Врата сокрушив медная, / и вереи адовы сотрый, / яко Бог всесилен, / род человеческий падший воскресил еси. / Сего ради и мы согласно вопием: / Воскресый из мертвых, Господи, слава Тебе.

Слава Отцу и Сыну и Святому Духу, и ныне и присно и во веки веков. Аминь.

Творец и Избавитель мой, Пречистая, / Христос Господь из Твоих ложесн прошед, / в мя Оболкийся, / первыя клятвы Адама свободи. / Темже Ти, Всечистая, / яко Божии Матери же и Деве, / воистинну вопием немолчно: / радуйся Ангельски, радуйся, Владычице, / Предстательство и Покрове, / и Спасение душ наших.

Тропарь, глас 6-й

Ангельския Силы на гробе Твоем, / и стрегущии омертвеша; / и стояше Мария во гробе, / ищущи Пречистаго Тела Твоего. / Пленил еси ад, не искусився от него; / сретил еси Деву, даруяй живот. / Воскресый из мертвых, Господи, слава Тебе.

Слава Отцу и Сыну и Святому Духу, и ныне и присно и во веки веков. Аминь.

Благословенную нарекий Твою Матерь, / пришел еси на страсть вольным хотением, / возсияв на Кресте, взыскати хотя Адама, / глаголя ангелом: срадуйтеся Мне, / яко обретеся погибшая драхма. / Вся мудре устроивый, Боже наш, слава Тебе!

Воскресная песнь после Евангелия

Воскресение Христово видевше, / поклонимся Святому Господу Иисусу, / единому безгрешному. / Кресту Твоему покланяемся, Христе, / и святое Воскресение Твое поем и славим: / Ты бо еси Бог наш, / разве Тебе иного не знаем, / имя Твое именуем. / Приидите вси вернии, / поклонимся Святому Христову Воскресению: / се бо прииде крестом радость всему миру. / Всегда благословяще Господа, / поем Воскресение Его: / распятие бо претерпев, / смертию смерть разруши.

Канон воскресный, глас 6-й

Песнь 1

Ирмос: Яко по суху, пешешествовав Израиль / по бездне стопами, / гонителя фараона / видя потопляема, / Богу / победную песнь / поим, вопияше.

Припев: Слава Господи, святому Воскресению Твоему.

Распростертыма дланьма на кресте, / отеческаго исполнил еси благоволения, благий Иисусе, всяческая. / темже победную песнь Тебе вси поим.

Страхом к Тебе, яко рабыня, смерть / повелена приступи Владыце живота, / тою подающему нам безконечный живот и воскресение.

Слава Отцу и Сыну и Святому Духу, и ныне и присно и во веки веков. Аминь.

Своего приемши Содетеля, яко Сам восхоте, / от безсеменнаго Твоего чрева, паче ума воплощаема, Чистая, / тварей воистинну явилася еси, Владычица.

Песнь 3

Ирмос: Несть свят, / якоже Ты, Господи Боже мой, / вознесый рог верных Твоих, Блаже, / и утвердивый нас на камени / исповедания Твоего.

Бога распинаема плотию зрящи тварь, растаявашеся страхом: / но содержительною дланию нас ради Распятаго, крепко держима бе.

Смертию смерть разорена лежит окаянная без дыхания: / Живота бо не терпящи божественнаго приражения, / умерщвляется крепкий, и даруется всем воскресение.

Слава Отцу и Сыну и Святому Духу, и ныне и присно и во веки веков. Аминь.

Божественнаго рождества Твоего, Чистая, / всякий естества чин превосходит чудо: / Бога бо преестественне зачала еси во чреве, / и рождши пребываеши присно Дева.

Песнь 4

Ирмос: Христос моя сила, / Бог и Господь, / честная Церковь / Боголепно поет, взывающи, / от смысла чиста о Господе празднующи.

Древо процвело есть, Христе, истинныя жизни: / крест бо водрузися, / и напоен быв кровию и водою от нетленнаго Твоего ребра, / живот нам прозябе.

Не ктому змий мне ложне обожение подлагает: / Христос бо богоделатель человеческаго естества, / ныне невозбранно стезю живота мне отверзе.

Слава Отцу и Сыну и Святому Духу, и ныне и присно и во веки веков. Аминь.

Яко воистинну неизвещанна и непостижима, / яже Твоего боголепнаго, Богородице, суть рождества, / сущим на земли и на небеси, Приснодево, таинства.

Песнь 5

Ирмос: Божиим / светом Твоим, Блаже, / утреннюющих Ти души / любовию озари, молюся, / Тя ведети, Слове Божий, / истиннаго Бога, / от мрака греховнаго взывающа.

Уступают мне херувими ныне, / и пламенное оружие, Владыко, плещи мне дает, / Тя видевше, Слове Божий, истиннаго Бога, / разбойнику путь сотворшаго в рай.

Не ктому боюся, еже в землю, Владыко Христе, возвращения: / Ты бо от земли мя возвел еси забвенна, / благоутробия ради многаго, / к высоте нетления воскресением Твоим.

Слава Отцу и Сыну и Святому Духу, и ныне и присно и во веки веков. Аминь.

Иже Богородицу Тя от души, Владычице мира благая, / исповедающих спаси: / Тебе бо предстательство непоборимое имамы, / истинную Богородительницу.

Песнь 6

Ирмос: Житейское море, / воздвизаемое зря напастей бурею, / к тихому пристанищу Твоему притек, вопию Ти: / возведи от тли живот мой, / Многомилостиве.

Распинаемь, Владыко, гвоздьми убо, / клятву юже на нас потребил еси: / копием же прободаемь в ребро, / адамово рукописание растерзав, мир свободил еси.

Адам низведеся, лестию запят быв, ко адове пропасти: / но иже естеством Бог же и милостив, / сшел еси на взыскание, / и на раму понес, совоскресил еси.

Слава Отцу и Сыну и Святому Духу, и ныне и присно и во веки веков. Аминь.

Пречистая Владычице, / рождшая человеком кормчию Господа, / страстей моих непостоянное и лютое утоли смущение, / и тишину подаждь сердцу моему.

Кондак, глас 6-й

Живоначальною дланию / умершия от мрачных удолий, / Жизнодавец воскресив всех Христос Бог, / воскресение подаде человеческому роду: / есть бо всех Спаситель, / Воскресение и Живот, и Бог всех.

Икос

Крест и погребение Твое, Жизнодавче, воспеваем вернии, и покланяемся, / яко ад связал еси, Безсмертне, яко Бог всесильный: / и мертвыя совоскресил еси, и врата смертная сокрушил еси, / и державу адову низложил еси, яко Бог. / Темже земнороднии славословим Тя любовию, воскресшаго, / и низложившаго вражию державу всепагубную, / и всех воскресившаго в Тя веровавших, / и мир избавльшаго от стрел змииных, / и от прелести вражия, яко Бог всех.

Песнь 7

Ирмос: Росодательну убо пещь / содела Ангел / преподобным отроком, / халдеи же опаляющее / веление Божие / мучителя увеща вопити: / благословен еси, Боже отец наших.

Рыдающее во страсти Твоей солнце, во мрак облечеся, / и во дни по всей, Владыко, земли свет померче, вопия: / благословен еси Боже отец наших.

Облекошася Христе схождением Твоим во свет преисподняя, / праотец же веселия исполнь, явися ликовствуя, взыграся, вопия: / благословен еси, Боже отец наших.

Слава Отцу и Сыну и Святому Духу, и ныне и присно и во веки веков. Аминь.

Тобою, Мати Дево, / свет возсия всей вселенней светлый: / Зиждителя бо Ты всех родила еси Бога, / Егоже проси, Всечистая, / нам низпослати верным велию милость.

Песнь 8

Ирмос: Из пламене преподобным росу источил еси, / и праведнаго жертву водою попалил еси: / вся бо твориши, Христе, токмо еже хотети. / Тя превозносим во вся веки.

Иудейския древле пророкоубийцы люди, / богоубийцы зависть ныне содела, / Тебе на крест вознесшия, Слове Божий: / Егоже превозносим во вся веки.

Небеснаго круга не оставил еси, / и во ад сошед, всего совоздвигл еси / лежащаго во гноищи, Христе, человека, / Тя превозносяща во вся веки.

Слава Отцу и Сыну и Святому Духу, и ныне и присно и во веки веков. Аминь.

От Света Светодавца Слова зачала еси, / и рождши неизреченно Сего, прославилася еси: / Дух бо в Тя, Отроковице, Божий вселися. / Темже Тя поем во вся веки.

Песнь 9

Ирмос: Бога / человеком не возможно видети, / на Него же не смеют чини Ангельстии взирати; / Тобою бо, Всечистая, явися человеком / Слово воплощенно, / Его же величающе, / с Небесными вои / Тя ублажаем.

Страстей непричастен Ты пребыл еси, Слове Божий, / плотию приобщився страстем: / но решиши от страстей человека, / страстем быв страсть, Спасе наш: / един бо еси безстрастен, и всесилен.

Тлю смертную прием, тления соблюл еси тело Твое невкусно, / Твоя же животворящая и божественная, Владыко, душа, во аде не оставлена бысть: / но якоже от сна воскрес, нас совоздвигл еси.

Слава Отцу и Сыну и Святому Духу, и ныне и присно и во веки веков. Аминь.

Бога Отца, Сына собезначальна, / вси человецы устнами убо чистыми славим, / неизреченную же и преславную Духа Всесвятаго силу чтим: / едина бо еси всесильная Троица неразлучная.

Стихиры воскресные на хвалитех, глас 6-й:

Крест Твой, Господи, / жизнь и воскресение людем Твоим есть, / и надеющеся нань, / Тебе воскресшаго Бога нашего поем: помилуй нас.

Погребение Твое, Владыко, / рай отверзе роду человеческому: / и от истления избавльшеся, / Тебе воскресшаго Бога нашего поем: помилуй нас.

Со Отцем и Духом Христа воспоим, / воскресшаго из мертвых, / и к Нему вопиим: / Ты Живот еси наш и Воскресение, помилуй нас.

Слава Отцу и Сыну и Святому Духу, и ныне и присно и во веки веков. Аминь.

Преблагословена еси, Богородице Дево, Воплощшим бо ся из Тебе ад пленися, Адам воззвася, клятва потребися, Ева свободися, смерть умертвися, и мы ожихом. Тем воспевающе вопием: благословен Христос Бог, благоволивый тако, слава Тебе.

Тропарь воскресный

Воскрес из гроба и узы растерзал еси ада, разрушил еси осуждение смерти, Господи, вся от сетей врага избавивый; явивый же Себе апостолом Твоим, послал еси я на проповедь, и теми мир Твой подал еси вселенней, Едине Многомилостиве.

← Всенощная и Литургия. Глас 5-й Всенощная и Литургия. Глас 7-й →

Если вы нашли ошибку, пожалуйста, выделите фрагмент текста и нажмите Ctrl+Enter.

Оставить комментарий

Ваш адрес email не будет опубликован. Обязательные поля помечены *